Ruhologili Literatur

Imisu Patre

Imisu Patre, hu yu sen in Janatu:

Yusu name am besantogi.

Yusu wangudom am ata.

Yusu vole am befale

denpul in Dunya kom in Janatu.

Am gibe tas imi nundin imisu moydinli roti.

Ji am mafu imisu malfale

denpul kom imi mafu ete hu da malfale anti imi.

Ji am no lide imi cel in yoho,

mas am hurugi imi of burya.

Koski yusu to sen wangudom

ji kowa, ji dayxerafu

dur he moywatu.

Amen

Towa de Babel

Per total Dunya hay un basa ji un pala. Durki ete dao hoy dongu, ete ewreka pangugeo in dexa Xinar, ji ete xorogar denloka.

Ete soho loga tas se, “Am ata, imi am fale ituka, ji imi atex oto finfe na sen jumbi.” Ete hare ituka fe tayti fe petra, ji ete yongu taru fe tayti fe milatu.

Jaxali, ete loga, “Am ata, imi am kostrui tas imi xaher, har towa hu dasu kapi dadal asman, celki imi am supraidi cel xohra; fe alo kaso, imi xa discu cel in alodexa per total Dunya.”

Mas Prabu infraidi cel na oko xaher ji towa hu insan le kostrui da.

Prabu loga, “Am oko, ete sen un demo, ji moyete hare un basa, ji hinto sen dento hu ete xoru na fale da. Fe nunya, nilto hu ete nyatu na fale da xa sen nenible fe etesu kaso. Am ata, imi am infraidi, ji denloka imi am disordenu etesu basa, celki ete no abil na soho aham sesu pala.”

Fe folo, Prabu disgi ete xorfe denloka cel perya de total Dunya, ji ete esto na kostrui xaher.

Denseba, ren namegi tas to Babel, koski denloka Prabu disordenu basa de total Dunya. Xorfe denloka, Prabu disgi ete cel perya de total Dunya.

Kido cel Xanti

Prabu, am sengi mi tul fe yusu xanti:

Denloka hu hay nefra, mi am plasi lubi.

Denloka hu hay malfale, mi am plasi mafu.

Denloka hu hay posarmoni, mi am plasi armoni.

Denloka hu hay malxey, mi am plasi satiya.

Denloka hu hay xanka, mi am plasi xinen.

Denloka hu hay posonxala, mi am plasi onxala.

Denloka hu hay poslumin, mi am plasi lumin.

Denloka hu hay hazuniya, mi am plasi hoxya.

Gao Kef, mi am no xerca denkwanti na beanwi kom na anwi,

na beaham kom na aham,

na belubi kom na lubi,

koski yon na gibe, imi taslum;

yon na sewanji, imi ewreka;

yon na mafu, imi bemafu;

yon na morcu, imi rixencu cel in finikal jiwa.

Amen

Salom Maria

Salom Maria, nimatupul,

Prabu sen ton yu.

Barakado sen yu intre femixu,

ji barakado sen fruta de yusu rahim, Yesu.

Santo Maria, Matre de Teo,

am kido pro imi, dambiyen,

fe nunya ji fe satu de imisu morcu.

Amen