Stories by Vanege

Hikaye fal Vanege

Safe Rubahe

Hinte sen juni rubahe. Tesu tofalari sen totalmo sefide kom wadi xafe taze dutaluji. He nil bruno or syahe burtyan sen okoible. In rubahelari, nilto sen maxmo safe kom tesu tofalari, ji te sen daymo fahuri tem to. Kos to, te name Safe Rubahe.

Bardimosem ata. Fe soba, denwatu hu rubahe exidi sesu ogar, ete oko xanxwi hu da sen imanuneniblemo sefide. Juni rubahe, hu da le nilwatu oko taluji, fori vole na yuxi fe to. Ete tyao, goyu, gulun. Taluji sen yukwe ji amusane.

Hin juni rubahe vole pia na oko ku taluji le alogi etesu jowey kemaner. Lildrevo ji daypetra, bax talujili cengu, no haji sen aloyagiible. Pia perya de hosu no haji sen okoible. Moyto sen sefide, sefidemo safe, har safeya sim sol kom dento de safe rubahe.

Plu rubahe le yuxi fe exya dur total din. Noce xoru, ji atre voka juni rubahe. Moyte ruata, minus safe rubahe. Te le godomo teli kentan. Te no haji rukone ku te ata of keloka. Te sen sonxido. Moy alo rubahe xerca te, mas kos sefide safeya de tesu tofalari, ete no sukses.

Totalmo luminkal. Safe rubahe fe nunya sol ore plu kaospul rusoti. Haulsa tayti rubahesa. Te befobi. Tesu unyum somno ex ogar xa sen fobipulmo bardipul. Rubahe sangu ji bolcu fe comen de daypetra. Fe onxala, tesu ewrekanenibleya pia xa funsyon anti rubaheyamfil haul.

Fe fini, soba. Haul sen sotikal. Safe rubahe musi na bonyongu kurto luminpul watu cel na riewreka sesu famil. Fe asif, le hay hata max taluji dur noce, ji fe folo, he ban pedamarka sen koberido. Rubahe haja idey... ji te ewreka!

Okonenible, yon velosi tyao, safe rubahe sukses na bujo kargux. Yon sesu denta, te kata gardan. Per mor kargux, rubahe gulun, celki tesu tofalari bekoberi taze, roso damu. Rubahe fikir, "Hinmaner, mi xa sen okoible!"

Sipul, xafe watumon, un te of familyen de rubahe xoroko roso figura hu da harka fe telije. Mas, koski te le nilwatu oko sim banto, ji koski te oko multi damu, familyen xoru na awpawbu ji na dayloga, "Am awpawbu, hay kayvutu!"

Gao Drevo

Hay wadi hu denloka moy planta armonipul jiwa. Denloka, hay sosyal regula, hu planta no haki na sencu maxmo gao kom tiga metro. Dento yakingi, ki moy plantali bioyen abil na taslum kufi lumin cel na bon jiwa.

Fe hataya, ban din, dayvento preporta bija of teli loka. Xafe watumon, bija kufi xunjan, fe folo ki ren abil na oko ki bija sen of jongu fe dahunli drevo hu da sen totalmo nenkonedo in hin wadi.

Fe xoru, planta hu da ogar in wadi hoxcu tem hin preata. Folki jowey sen maxmo doyan fe jongu, to max abil na tahamul ji adate fol alocu.

Hin neo drevo xunjan ji xunjan. Mas neo drevo no esto na xunjan lefe limite fe tiga metro. Te multi suki lumin, ji te moywatu vole max to. Te xoru na krea day sistema fe xube ji dahun, cel na bujo max sola-lumin.

Jali planta loga tas neo drevo: "Fe lutuf, am esto na xunjan, imi no haji taslum kufi lumin." Gao drevo jawabu: "Eger uyu vole lumin, am xunjan. Mi layeya lumin koski mi le xunjan."

Mas no moy planta abil na xunjan, ji no moy planta vole na jento cel lumin. Fe bonxanse, den drevo sen solo te hu da no ehtiram alote. Fe folo, alo planta karar na posjui hin sefil unyen.

Ban din, hay bofun. Multi bala vento pasidi wadi. Planta tongo fleksi fol ventoli pel. Nerya de bante ton alote sahay ete na no sokutu. Mas gao drevo, kos sesu gaoya, no abil na taslum sahay. Te musi na solo tahamul moy ventoli pel hu da presyon moy tesu xube samawatu.

Gao drevo peti sahay: "Am sahay mi! Mi fikir ki mi nerxali sokutu!" Alo planta, hu da no real abil na sahay, loga: "Am posxunjan! Am posxunjan!" Mas posxunjan no sen ible. Fe fini, drevo sokutu.

Xafe bofun, Sola ruata. Moy planta abil na oko kano de gao drevo hu da nun total leta per geo. Te morcu, ji tesu dahun ji bija awfley. Bannumer planta morcu kos sokutu, mas minimum fe nunya, dom sen totalmo koberido yon lumin.

Arteyen

Hay maymun hu da multi suki na rasamu. Fe moy din, te rasamu plu neo xey. Te suki na rasamu asman, natura, hewan. Te suki na rasamu moyto, ji te suki na rasamu moywatu. Te fikir: "Denwatu hu mi sen day, mi xa sen arteyen. Dento sen misu roya."

Atre de maymun hifazi pesa tas sesu bete. Yon pesa, maymun abil na estudi in xohrapul arteli eskol. In eskol, maymun multi estudi. Te vole na dadal sesu roya, mas te pia no vole na malyongu pesa de sesu atre.

Maymun pimpan musi na onexa sesu rasamu tas alimyen. Alimyen multi komenta: "Yusu rasamu sen bon, mas kam yu abil na alogi den bage?" Duli mara, ete loga ki rasamu haja detale. Duli mara, ete loga ki hay godo detale. Duli mara, ete loga ki no hay kufi kolor. Duli mara, ete loga ki hay godo kolor. Moywatu, ete no sen kufimo truti.

Maymun sukses fe finili eksame, ji te taslum eskoldoku. Te sen hox, koski te nun sen huru. Te fikir: "Mi nun abil na rasamu dento hu mi vole da, denmaner hu mi vole!"

Mas maymun haja na cudu pesa. Fe folo, te xerca person hu da vole na kari rasamu. Fe bonxanse, maymun ewreka kliente. Maymun vole na fale daymo bon ergo tas sesu unyum kliente. Eger klientelari sen truti, te xa hare max xohra ji te xa hare max kliente. Xafe multi ergo, te fahuri onexa sesu rasamu tas kliente. Kliente jawabu: "Yusu rasamu sen bon, mas kam yu abil na alogi den bage?" Maymun karar na rifale total rasamu.

Fe hataya ki maymun sen daymo talentopul, te haja xugwanpul kliente cel na taslum kufi pesa. Te moywatu fikir: "Eger kliente no sen truti, te xa no ruata." Pimpan, te musi na rasamu he sama xey dur total din. Te pimpan no haji hare energi dur axam. Denmaner, maymun jiwa dur plu nyan.

Mas ban din, te karar na fale wakufa. Te le sukses na hifazi kufi pesa cel to. Te fikir: "Mi nun abil na rasamu dento hu mi vole da, denmaner hu mi vole! Mi xa rahatu yon na huru rasamu, denmaner hu mi le fale denwatu hu mi le sen daymo juni."

Te side ner fe sefide paper, har pentu-broxa ji inku. Te oko paper. Te xidu na imaje banto. Te oko paper. Te xidu na imaje he banto. Paper resta sefide. Te fale plu linea. Mas nil menapul to precu. Te no sukses na rasamu dur total din. Te le wanji denmaner hu na rasamu yon furaha ji huruya. Na rasamu no haji sen dayfilya, mas sol ergo.

Multi nyan pasa. Maymun nun sen lao. Te ergo in nongyodom hu te le warisa da. Te le no pifu broxa dur lungo watu. Kos jaxne, maymun bevisita sodar ji tesu bete. Un juni bete vole na onexa rasamu fe ajabu hewan tas maymun Tie.

Maymun Tie swal: "Hinte sen ke hewan?

Bete jawabu: "Te sen mumu!"

Maymun Tie loga: "O, mimbay, mi nun aham."

Bete swal: "Kam yu suki misu rasamu, Tie?"

Maymun Tie jawabu yon swal: "Kam yu suki yusu rasamu, Bete?"

Bete jawabu: "Si! Mi sen hox tem to."

Maymun Tie loga: "Fe folo, yusu rasamu sen perfeto. Am alogi nilto."

Bete dayloga: "Xukra! Denwatu hu mi sen day, mi xa sen arteyen!"

Maymun Tie dayloga: "Yu uje sen!"

Dragon ji Panda

Ner fe kapi de gao jabal hay gufa. Dragon ogar in to solo ton sesu hazina. Te hare multi dahabu, jawheri ji alo jacipulxey hu te le cudu da of plu jali xaher.

Dragon ganjon ki te haji wala xey, ji ki jali xaher no haji sen interesne. Fe folo, te karar na fley cel teli loka cel na ewreka neo xey cel na maxusgi tas sesu hazina.

Xafe lungo fley, fe fini, dragon ewreka xaher. To sen nenpimpan xaher hu da loka in drevolari. Koski moyto sen sangudo bax dahun, dragon karar na pergeo. Per geo, te oko panda hu da kwasi hare nil fobi kos presen de dragon.

Te swal tas panda: "Kastilo feya keloka?"

Panda jawabu: "Kastilo? No hay kastilo hinloka."

Surprisado dragon swal: "Fe folo, keloka uyu hifazi uyusu jacipul xey? Kam uyu hare banko or hata jandan inplasidom?

Panda loga: "No, no. Imi no hare denpul dom."

Dragon sen okoiblemo posahamdo. Panda maxpul loga: "Imi no hifazi. Moyto hu imi haja da uje sen cuduible fe jowey."

Panda loga: "Mi nun sen yamkal, fe folo, mi le toncudu bambu. Kam yu ger suki na yam ton mi?" Dragon, hu da sen pilodo kos sesu lungo daoya, swikara. Panda sen hox, ji te loga: "Eger yu haja banto, am jandan peti. Denmaner, moyto funsyon hinloka."

Ete yam xetocubon supa, ji ete pala dur lungo watu. Panda, hu da sen daymo dostefil, hikaye multi tem sesu jiwa. Pia te hare soloyapul jiwa.

Dragon loga fe fini: "Mi nun musi na awidi."

Panda loga: "Kam uje?"

Dragon jawabu: "Si, mi haja na gardi misu hazina."

Panda nercu cel dragon, ji te gibe tas te lungo weygebo. Dragon le nilwatu taslum weygebo fe leya. Te loga: "Dento mena keto?" Panda jawabu: "To sen maner na onexa ki mi le suki hin momento ton yu. Kam yu ger vole na jaribi?"

Dragon plasi sesu bala gebo wey panda, ji te xoru na harka sesu fleytul. Panda swal: "Yu fale keto fe nunya?"

Dragon jawabu: "Mi porta yu cel misu gufa, koski yu sen misu hazina."

Kolorokobimar Piu

Hay jongu fe piu hu da multi suki blue xey. Den piu multi suki na plasi blue xey in sesu ogar ji in jali jarden. Folki jarden sen maxmo dekorado yon bluexey, to sen maxmo magnetosim fe piuli tonyen.

Mas un te of piu sen kolorokobimar. Te no oko aloya intre blue ji jalo xey. Fol te, blue flura ji jalo dahun hare sama kolor. Fe resulta, te ixikal toncudu xey fe moydua kolor.

Moy alo piu suki na haha tem den normakal piu. Ete loga: "Am oko, te le ripul seleti mal kolor!" "Tesu jarden sen daydenmo colo!" "Te xa nilwatu ewreka lubiyen."

Fe xoru, den coxo lawfen kolorokobimar piu. Mas xafe watumon, te posjui ete. Te fikir: "Fol mi, misu xey sen blue. Misu xey sen colo fol ete, mas oto sen meli fe mi."

Alo piu xorjui ki kolorokobimar piu posjui ete. Na coxo te no haji sen amusane koski te no ruaksyon. Fe folo, ete esto na lawfen. Ete ripul idi na xerca blue xey tas sesu suli ogar.

Hay xosu blue xey, mas hay multi piu hu da vole oto. Piu pimpan musi na jento cel bluexey. To pimpan okur ki piu cori xey de alo piu. Dento finikal okurgi konflito.

Kolorokobimar piu no rol in den konflito. Te trankwilo ergo tas sesu suli jarden hu te dekora da fol sesu suli suki. Tas sesu jarden, te maxusgi multi meli petra ji jozi hu alo piu posjui da.

Ban din, visitane piu pergeo in jarden de kolorokobimar piu.

Visitane piu loga: "Yu hare maxim meli jarden of moyto hu mi le oko da!"

Kolorokobimar piu sen surprisado. Dento sen unyum mara hu bante loga dento tas te.

Kolorokobimar piu swal: "Xukra. Mas yu suki misu jarden keseba?"

Visitane piu jawabu: "To sen daymo day ji jalo. Mi suki jalo kolor."

Kolorokobimar piu loga: "O, mi fikir ki misu jarden sen blue."

Visitane piu loga: "Ha ha, yu sen amusane. Jalo ji blue sen samamenalexi! Den dua lexi mena sama to!"

Fe fato, pia visitane piu sen kolorokobimar!

Leli Watuyen Wazo

Wazo sen name de lao piu. Wazo fikir ki denwatu hu te sen juni, moyto le sen perfeto. Moy hewan le sen maxmo ehtiramfil. Moy hewan le hare maxmo bon suki. Fol te, globa le sen bon, mas fe nunya, globa sen bur. Fe fato, Wazo no sen daymo lao, mas tesu ijen sen yakinmo denpul.

Wazo hare dua bete. Ete sen normapul junipiu hu da hare normapul ninili suki. Fe ban din, ete peti tas atre izin na idi cel musikaxow.

Bete swal: "Kam imi harizin na idi cel musikaxow de Jonimo?"

Wazo swal: "Den Jojo sen kete?"

Bete loga: "Te sen xohrapul rapuyen!"

Wazo loga: "Uyu no harizin."

Bete swal: "Keseba???"

Wazo multi belawfen den nenhajado swal. Fol te, jawabu sen mingumo mimbay. Rapuyen wakil bur jiwali maner. Ete populergi dududan, alkohol ji alo burdava. Ete hata loga tem possantoxey!

Mas maxim swikaranenible masele sen ki ete fale antinormadokuli musika. To sen nefralaye ji basabur ki ete presenta lexili dukaku denpul kom arte. Musikali normatim le nilwatu aproba dento. Bete musi na resta teli fe ete. Eger no, ete xa hare bur suki. Kultura xa besonxi, ji sosyaltim xa dissokutu.

Wazo swal: "Kam uyu no abil na ore klasiko musika denmaner hu normapul bete fale?"

Bete dayloga: "Feka!"

Wazo loga: "Am no loga feka!. Am loga dyabol!"

Bete dayloga: "Dyabol!"

Wazo loga: "Am no loga dyabol. Dento sen dambipul!"

Denwatu, bete xoru na wawa. Xafe watumon, Wazo aham ki te le sen godomo xucyofil. Cel na peti mafu, te jeni tas sesu bete na tongo idi cel hewandom.

Multi doyan hewan loka in hewandom. Wazo real no suki den kolorpul hwanjin hu te ijen da cufampul tas sesu suki. Mas tesu bete kwasisen daymo hox, ji ete bewao moy hewan.

Famil juioko taco:

Wazo loga: "Hey, bete, am oko ki den piu sen daydenmo simpatilaye. Ete no abil na fley."

Bete loga: "Mas ete pawbu daymo velosi!"

Famil juioko hufax:

Wazo loga: "Hey, uyu! Uyu fley keseba? Uyu sen mamoyen! Mamoyen no fley!"

Hufax loga: "Am resta imi trankwilo, laoyen!"

Bete belawfen xekayefilya de sesu atre. Wazo no esto. Te xekaye. Te sahigi. Te poscosan. Te sen posyukwe.

Folki watu max pasa, xekayefilya de Wazo max magneto jui de neryen. Lil grupo fe hewan le toncudu ner fe Wazo:

Hewanli grupo loga: "O, am oko! Mi le no jixi ki hewandom hare pia fosil!"

Wazo dayloga: "Fekali dyabol!"

Okresim Solo-krabe Okreyen

Hay sahel denloka hu multi meli solo-krabe ogar. Moy solo-krabe labas sadafa hu da ofata mor sadafa-hewan. Bannumer sadafa sen sol sefide, bannumer sadafa sen kolorpul. Un solo-krabe hare okresim sadafa. Kos to, te name Okreyen. Hin sadafa no sen daymo espesyal, mas Okreyen multi suki to.

Fe moy nyan hay day merasem. Kriban moy solo-krabe idi cel to. To sen merasem fe sadafali porgi. Fol cwenton, moy solo-krabe am gibe sesu sadafa tas solo-krabe hu da sen minmo lao fe un nyan. Denmaner, komuntim riyongu bon sadafa. Pia, solo-krabe suki na jaribi neo baytu.

Mas Okreyen, te no suki. Okreyen le no rol in merasem dur tiga nyan. Te fikir, "Misu sadafa sen perfeto. To sen bage of mi. To sen misu to."

Xafe bannumer mesi, Okreyen kentan baxbaharili jabal. Abruto, Okreyen ewreka mor xarke. To kwasisen xetocubon. Nil maso-yamne hewan ner loka cel na konkure. Denpul kihoy okur sol fe un mara in jiwa de solo-krabe. Okreyen loga, "Daydenkwanti yamxey! Mi xa yam moyto!"

Okreyen xoru na yam. Te yam ji yam. Te hisi ki te maxmo ji maxmo katina abil na harka. Mas te durepul yam.

Abruto, okresim sadafa de Okreyen kasiru. Te oko ki tesu baytu awsokutu fe multi bage. Te sen godomo lil. Te dayloga: "No! Misu sadafa! Misu baytu!"

Sadafakal solo-krabe paniko. Solo-krabe haja bala dalutul cel na gardi sesu daif ji xetocubon fubu. Ji fe nunya plu maso-yamne hewan ata. Fori hala behaja cel na no morcu.

Te fikir: "Kwasi, mi no haji hare alo opsyon." Ji sadafakal solo-krabe inidi jali plastikoli botela. Botela no sen konfortane. Botela pia sen daymo xorjuiible.

Te fikir: "Ible, eger mi sangu intre awjetixey, ren xa no xorjui mi."