Poema fal Sarin Ci

Sabar Sehacu

Am peti mafu tas yu
ji am mafu yu,
cel na safegi nahir,
cel na dadal bahari.

Am hasaxi suyon,
am lyudongi yusu siko.
Am hisi taze sui
hu da sen sangudo
intre burplanta.

Yusu tutum sen meli
ji to layeya xuli.

Yu xa rili tabasum
fe hataya ki hay bofun.
Am no intizar sahi mosem
koski jiwa uje sen waone.

Barix sui yusu nongyo,
vento suhegi yusu sweta,
piu piusa narem melodi ji
kismetu gibe surprisa tas yu.

Kam yu suki meliya de lexi?
Mi ewreka anwi intre oto,
denwatu hu oto no krea kasirudo kanca.

Am sen lutufpul tas yu.
Am sabar loga tas yu
dento hu da guton yu,
koski sehacu xoru yon aham.

Meli Estare Ci

Posamusane xey bexekaste meli estare.
Te gibe tas mi hoyo cel na jiwa.
Imi sencu sodar, mas kismetu le vole na julagi imi.
Xafe lungo jento, imi cudu triunfa.
Nunli, imi hare bala genu.
Brilapul xaya intizar imi.

Terorli Memori

Mi ewreka wanjido suratu in lama moksayli jaror,
to nasacu denpul kom din fe dayhoxya.

***

Te kweho tabasum tas mi,
te peti alo melodi,
mas misu melodi no sen denmo meli kom tesu hoxya,
misu melodi inhare sol misu guton ji burfahuriya;
hatali, te hox danse denwatu hu mi sotigi gitara,
kwas te abil na sengi bardipul luminkalya cel kolorpul bum.

***

O no! Misu hanta xorpilo!;
Femprince gadibucu!
Mi haja na ewreka binandom nerxali,
leki tesu xamxir dadal mi.
To kwasisen ki seza sen blokinenible.
Mi hare sol un onxala,
na yongu misu voka.
Mi cihe: Sahay!

***

Denwatu, misu doste osel xorata,
yao hanta de femprince, hu da laxogi xamxir ji da ayay.
Mi yongu den kihoy cel na yonidi osel
ji na firaru of kastilo dur na tonporta misu memori.
Misu leya nun sen xulido, or el dento mi fikir,
koski dur na midiyam, osel loga tas mi:
โ€œYu xiwonโ€ฆโ€

Liltermopul

Vento preporta lilpala
of mosemli ospuro
ji nasacu de flura
hu da xehi sesu kolor.

Bardi rukadam,
drevo gibe sesu saye tas daoyen.
Fe sesu bage, pentuyen narem harka
sesu lilbroxa ner fe nahirbyen.

Intre sui, tanxiku sangu se,
lyudon sangu sesu guton
intre tami melodi
har tami nasiha.

Roso Kalamu

El lama kalamu mi le ewreka,
to haji abil na eskri,
roso sen tesu kolor,
o, jandan zarifya.

Mi sen solo in luminkal kamer
koski mi befobi Sola,
mas, roso kalamu haja max lumin
cel na onexa sesu total meliya.

Hin plastikoli kalamu tonya mi dur lungo watu
to tonya mi dur watu fe hoxya ji hazuniya,
to tonya misu memori ji misu imajeya.
Fe fini, to kalcu.
Am rahatu, roso plastikoli jangeyen.

Kasirudo Kanca

Yu befobi leya,
yu klosicu fe ruke de divar,
ji, yon masku fe tabasum,
yu kwasigi ki moyto sen bon.

Mi jixi, ki kasirudo kanca,
inpifugido in yusu cati,
haji guton yu,
fe hataya ki
yu xidu na sangu oto.

Am loga tas mi ku keto okur tas yu,
mi sen hinloka cel na ore yu,
am no intizar finki mi no haji sen hinloka.
Am nunli loga to tas mi,
am fori loga to.

(mi intizar.)