Utaravento ji Sola debate ku kete sen maxmo bala, denwatu hu daoyen preata koberido in termopul kapa. Ete sohovada ki dente hu da unyum kosa ki daoyen ofplasi sesu kapa ingay na bekolyo maxmo bala kom alote. Denwatu, Utaravento vento yon sesu total balaya, mas folki te max vento, daoyen maxmo tange koberi se yon kapa; ji fe fini, Utaravento esto na xidu. Denwatu, Sola termopul xorbrila, ji fori, daoyen ofplasi sesu kapa; ji fe folo, Utaravento bexucyo na etiraf ki Sola sen maxim bala te of dua te.
Ban mara, denwatu hu singa somno, lil maux xoru na pawbu cel super ji infer per te. Nerxali, hinto jagegi singa, hu da plasi sesu dayday peda per te, ji da buka sesu day jabare cel na nigalu te. Lil maux dayloga, “Mafu, gao wangu. Am awmafu mi hin mara, mi xa nilwatu wanji to! Ible, mi abil na rugibe lutuf ban nerxali din.” Singa denmo multi begude idey hu maux ger abil na sahay te, fe folo ki te lifti sesu peda ji te izin tas maux na idi. Banwatu fe xaya, singa bebujo in bujotul, ji xikaryen, hu da vole na porta singa jiwane cel wangu, binde hinte cel drevo, durki denete idi na xerca wagon cel na porta singa. Den preciso momento, lil maux folpasa fe xanse, ji fe na oko hazuni burxanse de singa, dente nercu cel hinte, ji nerxali, maux awyao kordo hu da binde wangu de hewan. Lil maux loga, “Kam mi le no sahiloga?”
Lil doste abil na finsen daybon doste.
Banwatu, rubahe oko kraw na awfley har bage fe jubin in sesu conce, ji na esto per xube de drevo. Rubahe loga, “Dento sen tas mi.” Te anda cel peda de drevo, ji te dayloga, “Bonnuru, senyor kraw, yu okocu daydenmo bon nundin: yusu yumaw sen daydenmo brilapul; yusu oko sen daydenmo luminpul. Mi sen yakin ki yusu voka xankakal ultrapasa dento de plu alo piu, sama kom yusu figura. Am izin tas mi na ore sol un lala fal yu, celki mi am salom yu denpul kom wangu de piu.” Kraw lifti sesu kapi ji te xoru na krawsa fol sesu otimaya, mas fe momento hu fe da te buka sesu munte, bage fe jubin sokutu cel geo, sol celki rubahe awbujo to. Te loga, “Hinto sen kufi. Hinto le sen moyto hu mi vole da. Por yusu jubin, mi xa gibe tas yu nasiha cel xaya: am no xinloy cosanyen.”
Plu kargux denmo multi bebohay plu alo hewan, fe folo ki denete no jixi ku na idi cel keloka. Fori xaki ete oko un solo hewan na nercu cel ete, ete awpawbu. Ban din, ete oko yesen umalari hu da daypawbu fe jowey, ji fe real paniko, moy kargux awvelosicu cel ner hosu, kararpul na garaku fe tayti fe na jiwa in denmo fobipul dujotay. Mas preciso momento hu ete nercu cel byen de hosu, kroalari, fobido fe turno fal nercu de kargux, awvelosicu ji tyao cel in sui. Un te of kargux loga,“Sati, imisu halulari no sen denmo bur kom to kwasisen: moywatu hay bante in maxmo bur halulari kom yu.”
Dua insan tongo dao pas drevolari denwatu hu baru abruto precu in etesu dao. Un te of daoyen velosi supraidi cel drevo, ji te sangu intre xube. Alote oko ki te xa beatake. Fe folo, te infrajeti se cel geo. Baru ata cel te, ji dente plasi sesu nasa ner fe tesu ore, ji te nasa insan fe totalya. Mas fe fini, baru resta te, koski nil baru yam mor maso.
Jaxali, alo daoyen infraidi of drevo ji, fe na haha, te swal tas sesu doste ku baru le lilloga keto tas tesu ore. Tonyen jawabu, "Te le gibe tas mi hin nasiha: Am nilwatu xinloy doste hu da awresta yu denwatu hu hatari nercu."