“Navikef Babur, imi preata cel Zuhura xafe kekwanti watu?” ospuro le swal.
“Xafe un safta, daju,” navikef jawabu.
“Waone! Imi velosi dao. Mi uje vole na oko den sofipul insan, mas, kam yu sen yakin ki hay insan in Zuhura?”
“Mi sen totalyakin. Am no yolyu tem to, xwexiyen ospuro.”
Telixali, denwatu hu ete preata cel den posdostefil planeta, day bofun treme etesu navi.
Ospuro cihe, “Imi xa morcu!”
Mas navikef Babur dadal na andingi navi ji to pergeocu.
Denwatu, te loga, “Kwasi, imi preata cel Zuhura fe mal mosem.”
Jaxali, injeneriyen Koala nercu ji te loga, “Navikef Babur, hay problema: imisu navi xucyo xuli.”
Xafe juipul analisi, teknikatim denya ki energimamba fe fronpel de navi sen sungaydo.
Navikef ji kentantim, har presyonkostum, excu cel na xerca insanli sahay, mas ete no ewreka insan, ji fe asif, Ospuro becudu dayvento.
Ete no abil na ewreka Ospuro; fe folo, ete ruata cel navi.
Xafe watumon, teknikatim xorganci, yon radar, ban metal-estrutur hu da hanman nercu cel navi. Ete oko ekrin fe filmetul; fe folo, ete xorjui ki te sen bwawsunayen hu da preporta Ospuro in sesu mekanili gebo.
Den metalli bwaw kwasi vole na sahay, ji kos to, ete izin tas te na inidi navi. Xafe dento, ete medis Ospuro hu da sen sol ixikalcudo.
Bacelor Jojiha, of Hewanli Resurso, swal tas sunayen, “Senyor, yusu name sen keto?”
Ji te jawabu, “Bwaw!”
“Nunto, senyor Bwaw, kam yu am sahay imi cel na xuli imisu navi, fe lutuf?” bacelor swal.
“Bwaw!” metalli bwaw ripul jawabu.
Ji fori, te eskan navi, te ewreka problema, ji xafe analisi, te karar na haregi sesu energi tas navi. Jaxali, te linku sesu energimamba, yon sesu mekanili gebo, tas energimamba fe fronpel de navi.
Moyte in navi parti koski to ripul abil na fley.
Ete ruata cel sesu planeta, ji fe hataya ki ete no xorkone insan, ete ewreka neo doste.
Kiwi le vole na fley, denseba, te idi cel gufa de lao hufax cel na peti sahay.
“Am tonporta mi cel asman, fe lutuf. Denmaner, mi xa dadal misu roya fe abil na fley,” kiwi peti tas hufax.
Hufax ganjon simpati tas kiwi ji te loga, “Mi ger suki na fale dento, mas, mi no sen kufimo bala cel na tonporta yu; fe hataya, mi jixi ki ukabu sen bala ji te abil na sahay yu, mas, te ogar teli, tras bahari.”
Kiwi no taradudu ji, xafe dento, te sangu in navi cel na trasidi bahari, cel na peti sahay tas ukabu.
Xafe lungo dudao, kiwi preata cel teli daygeo ji te xoru na xerca ukabu moyloka.
Xafe multi duxerca, fe fini, kiwi ewreka te in gao jabal.
“Salom, senyor ukabu, mi sen kiwi ji mi ger suki na peti lutufxey tas yu.”
Ukabu jixivoleli oko kiwi ji te loga, “Kiwi, e… Mi le nilwatu oko piu hu da okocu sim kom yu. Yu peti lutufxey tas mi keseba? Kam yu no jixi ki mi abil na awyam yu?”
“Si, mi jixi dento, mas, unyum ji fe lutuf, am tonporta mi cel maximum gaoya in asman. Dento sen misu roya, na abil na gao fley. Xafe dento, yu abil na awyam mi.”
Ukabu besurprisa fobikalya de kiwi ji te loga, “Mi fikir ki dento sen majnuni roya, hatali, mi xa fale dento hu yu peti da tas mi.”
Fori xafe dento, ukabu woju kiwi yon sesu daynakun, te xorfley ji, denmaner, te dadal dayday gaoje.
“Kam yu furaha hin okoxey?” Ukabu swal dur na fley.
Kiwi xoru na wawa.
“Yu wawa keseba? Hinto sen yusu roya. Kam yu nun no suki to?”
“No, to no sen dento. Mi multi suki na fley. Mi daysuki to. Mi wawa koski mi sen daymo hox,” kiwi jawabu.
Ukabu xoru na aham neo banto hu da xorharka in sesu tutum.
Denwatu hu ete pergeocu in ban medan, kiwi swal, “Nunto, kam yu xa awyam mi?”
“No, kiwi no sen misu preferido menumon. Am awidi lefe ki mi sen yampeldo.”
Ji, fori xafe dento, ukabu ruidi cel sesu jabal.
Ana le oko ban ixara in dwer de kafedom: “Kafeyen sen hajado.”
Te karar na inidi. Suyayen presencu fe onexamesa durki ban klienteli duayen trankwilo glu kafe. Hwanjin sen sotikal ji furahane.
Ana nercu cel suyayen.
—Bondin.
—Bondin, junisenyor. Mi abil na sahay yu kemaner?
—Mi ata kos ixara fe ergo.
—Daywaone! Imi abil na pala durki imi glu kafe, eger yu vole.
Ete side fe ban ixgalukal mesa. Suyayen servi dua fenjan har kafe hu da sen buharne.
—Yusu name sen keto?
—Ana Lopez.
—To sen yukwe na xorkone yu, Ana. Mi sen Edwardo Montiel. Mi hare hin kafedom xorlefe des nyan. Mi haja neo kafeyen koski jaleli te le gami ji te xorogar in alo xaher. Yu sen of keloka?
—Mi sen of hinloka, of lilxaher Aloe.
—Kam yu estudi banto?
—Si, grafikali diseno ji anima, fe axam. Kos dento, mi xerca ergo fe soba or fe noce.
—Mi aham. Kam yu abil na ata xorfe lunadin finfe zuhuradin, xorfe satu sabe finfe satu des dua? Ergo no sen katina ji paya sen bon.
—To sen perfeto tas mi. Mi xoru na ergo kewatu?
—Jaxadin fe soba, eger to sen bon tas yu.
—Si, multi xukra, senyor Edwardo. Finfe xaya!
Rita le sen universitali xwexiyen fe arkitetur hu da laoje duades (20) nyan. Dur na side in sofa in sesu apartamen, te yuxi Moba fe Kendi yon sesu telifon.
Abruto, un femixu precu fe fronta de te. Hin precu betonya kurto brila, lilsoti ji lilvento.
Hin nenkonedo femixu kwasisen ixu hu da laoje tigades (30) nyan. Te labas esportuli sapatu, denimli blue xortu, orange blusa, solalense ji syahe lilgardanbendu har plu fidasim kantaka. Tesu tofa sen pinku, kurto ji cenguli.
Rita cihe dur na velosi tatmini halulari. Unyum, te fobi. Jaxali, te surprisa ji jixivole ku den femixu precu kemaner.
“Yu sen kete ji yu le fale keto cel na precu in misu kamer!?”
“Xanti, Rita. Mi asif kos na fobi yu,” nenkonedoyen loga dur na tabasum.
“Misu name sen Rita Monges ji mi ata of xaya, maxmo preciso, of nyan duakilo limades un (2051).”
“Rita Monges? Mas… mas… dento sen misu name! Am intizar… Yu nyatu keto temki yu ata of xaya? Kam yu sen mi?”
“Preciso! Mi sen yu, mas of xaya.”
“Hinto sen majnuniya!”
Juni Rita no abil na imanu dento hu da okur. Te motsu sesu pelipis ji te kurto comenli anda. Fe na hisicu maxmo trankwilo, te karar na swikara daywaone okurxey har trankwiloya, fe folo ki te oko he nil hatari.
“'Mi of xaya', yu laoje kenumer nyan? Kam tigades (30)?”
“No, azizu te. Mi no laoje tigades nyan, mi laoje caredes lima (45) nyan,” Rita of xaya furahado loga kos den nennyatudo cosan.
“Mi fikir ki na namegi mi 'mi of xaya' no orecu bon. Kam yu ger suki na namegi mi day Rita? Kam yu ger suki na benamegi mi lil Rita?”
“Si… Day Rita… To sen bon. Mi izin yu na namegi mi lil Rita.”
Day Rita side fe comen de lil Rita.
“Yusu watumaxina sen keloka?” lil Rita swal.
“Hin lilgardanbendu sen misu watumaxina,” day Rita jawabu dur na ixara yon dari hoy sesu gardan.
Te pia xomin ki to sen cinonpul tora har multi funsyon hu da funsyon yon vokali amiru.
“Em… Lilmo ajabu… Fe gwaho, mi no vole na sen adebukal, mas yusu tofa-estilo interes mi. Yu seleti pinku kolor keseba? Mi nyatu na loga ki to nasibu yu,” lil Rita komenta.
“Xukra. Mi suki ki yu velosi xinloy mi. Nunto, mi seleti hin kolor koski mi suki to.”
“Yu dao of xaya tas hin momento keseba?”
“Mi hoxcu kos den swal. Mi ata of xaya koski mi sen watugardiyen. Mi ergo in sirili firma fe watu hu da xidu na anjen bongi histori. Mas imi no harizin na ganxopu in muhim okur fe hataya ki oto sen afatupul, unyum, koski imi no abil na fale to ji, duayum, koski na fale dento ger kosa day hataripul alogi in histori. Denseba, misu misyon sen jandan: mi musi na yakincu ki yu triunfa in ban turnamen fe xahu fe mesi des un fe hin nyan, duakilo duades sisa (2026).”
Lil Rita analisi dento hu da day Rita jale loga da ji te loga, “Mi aham, mas, ki mi am triunfa in den xahuli turnamen behaja keseba?”
“Mi xa xomin to tas yu. Mi haja ki yu xekaste Martin Toledo in den turnamen. Te sen xwexiyen fe injeneri. Te no sen daymo maharapul in xahu; te hare sol kilo sabecen (1700) pwen fe ELO, mas den pwen sen kufi cel na xekaste moyte in hin xaher koski insan fe hinloka no multi yuxi xahu. Eger te triunfa in den turnamen, te xa cudu moypayado dao cel Norge cel na konkure anti gaodarajeli xahuyen. Kom yu abil na imaje, Martin xa velosi postriunfa moy yuxi denloka, fe folo, te daydepresicu.”
“Sol dento?” lil Rita gitayfrustrado swal.
“Yu peti tas mi ki mi xekaste Martin celki te no kingem xyuci anti usta yuxiyen? Mi no vole na kwasisen bur insan ji mi vole ki he nilte depresicu, hatali, mi no suki idey tem multi treyna kos dento.”
“Yu sahiloga tem dento, mas na bloki ki Martin depresi sen noro solo nor maxim muhim cele fe hin misyon. Imi cele ki te fol lega postriunfa ki fe folo te vole na ultrapasa yu ban din koski te sen daymo konkurefil. Xafe ki te maxgi sesu daraje, te xa vole na krea inhare fe YuKabel, hu da ilhamu max kom kilo juniyen cel na xwexi hin zarif esportu, mas dento haji no sen maxim muhim bage fe hin misyon. Hin plu neo ilhamudo xahuyen xa krea xayali projeto hu da frongi jawgu fe hwanjin yon xahu. Mi no harizin na gibe max detale tem hin projeto tas yu.”
“Mi aham, mas, he mi musi na xekaste Martin keseba? Alo insan abil na fale to, kam no?”
“Koski yu suya kwalita fe watugardiyen. Fe maxusya, mi jixi ki yu sen riskojuine ji yu jixi na hifazi siri. Ren uje fale kalkulus in misu firma fe watu ji ren finrasona ki hin ergomon sen perfeto tas yu.”
“Mi aham, mas mi no bon yuxi. Mi sol hare kilo carecen (1400) pwen fe ELO, dento no sen kufi cel na xekaste Martin.”
“Denseba, mi sen hinloka. Mi sen Gaoalimyen fe Xahu har duakilo limacen sisades (2560) pwen fe ELO. Mi xa istruksi yu ji, denmaner, yu xa dadal duakilo tigacen (2300) pwen fe ELO fol den logado kalkulus. Yu xa sen Intrenasyonli Fem Alimyen fe xahu xafe sisa mesi! Martin xa nilmaner abil na xekaste yu.”
“Den idey uje besuki mi, mas… e… mi xa bepaya?”
Day Rita haha ji loga, “Mimbay! Mas mi no harizin na gibe pesa tas yu. Mi xa kari tableta tas yu xafe turnamen. Fe maxusya, yu xa taslum jayeza fe turnamen ji titulo fe Intrenasyonli Fem Alimyen.”
“Suprem! Kam mi abil na swal tem yusu ergo?”
“Mi abil na loga sol ki misu ergo gwanxi xahu, watudao ji arkitetur. Am no fikir tem na awrestagi hin yusu profesi, nini.”
Xaki day Rita xomin cele de misyon tas lil Rita, ete tonkarar ki dente xa regulapul visita hinte cel na treyna te fe xahu.
Day Rita lilalogi sesu daraje denwatu hu te yuxi xahu anti lil Rita. Te xomin muhim tema fe xahu tas lil Rita: beyongupul buka, bawe, motif, tatika, plasi, fini, analisi, jmt. Xafe dua mesi fe treyna, lil Rita dadal kilo ococen (1800) pwen fe ELO.
“Hin daraje sen bon, yu uje abil na xekaste Martin, mas, imi haji musi na yakingi triunfa. Yusu triunfa musi na sen dispresyonne,” day Rita loga.
“Yu sen daydenmo bur! Kam yu vole ki mi daydenmo multi suferigi naive Martin?”
“Mimbay no, nini, mas denmaner, to sen maxmo bon cel misyon, fe maxusya, na max xwexi xa sahay yu cel yusu xayali profesi kom xahuyen.”
Dumarali, ete tongo exata cel na kari, na xafeyam or na jandan sampo. Day Rita, moywatu, labas solalense ji kwasigi na sen teli kuzin de lil Rita hu da name Deysi. Te kwasigi pia na sen hajul ji sotikal cel na hwepi na ganxopu fe nunli watu.
Moywatu hu ete idi cel he banloka, day Rita nostaljicu tem multi xey hu da sen bonkonedo or posamusane tas lil Rita.
Denwatu hu care mesi pasa. Lil Rita dadal duakilo cen (2100) pwen fe ELO kos treyna.
“To sen amusane. Kos yusu darsu ji na moydinli innetoli yuxi in Lilixahu, mi hisi ki mi xorlubi hin yuxi. Yu yozay ki mi burfilya cel xahu!” lil Rita humor.
Finili, mesi des un preata. Lil Rita dadal duakilo tigacen limades (2350) pwen fe ELO, multi maxim day to in xaher.
Fe din des dua fe mesi des un, lil Rita ineskricu in turnamen. Te betonya Deysi (day Rita).
“Mi dayansya, to sen unyum mara ki mi rol in hinpul okurxey. Hinloka, moyte kwasisen cinonpul,” lil Rita loga.
“Am sen trankwilo, yu musi sol na resta laxo ji na fokus. Moyto xa sen bon,” day Rita yunkigi te.
“Kam mi abil na jixi ku Martin sen kete?”
“Te sen den juniyen har lungo tofa ji kijawi ite-kamisa. To xa sen maxmo bon ki yu hwepi na oko te dur lungo watu cel na hwepi na kwasisen giximlaye.”
Martin ruwojune estay yon divar, fe na intizar xoru fe turnamen.
Fe ban momento, ete soho oko, mas fori xafe to, lil Rita alogi cele de sesu oko dur na fikir, “Te kwasisen jidi ji sexinloypul.”
Fe sesu bage, Martin fikir, “To sen ajabu ki bante vole na oko mi.”
Xafe ban minuto, rolyen side cel na konkure ji unyum plu yuxi xoru.
Lil Rita asan ji velosi triunfa plu unyum yuxi, denseba, day Rita nasiha tas te na xidu na maxmo hanman yuxi.
Pia Martin velosi triunfa moy yuxi.
Fe fini, finili yuxi preata: lil Rita anti Martin. Multi insan weycu cel na maxmo bon oko yuxi. Lil Rita xoru yuxi har sefide xahumon yon buka fe Sistema Colle, hu da sen tesu preferido buka fe xahu. Martin jawabu yon Bawe fe Sicilian cel na xidu na konhwoku Rita, mas, tesu estrutur sen bala har sirili estrategi. Martin xoraham ki te no abil na kasiru tesu bawe, fe folo, te xidu na porgi xahumon, hatali, te xorwala max xahumon kom Rita in moy harka. Finili, ete preata cel setin hu da sen totalmo triunfali pro Rita denwatu hu Martin fale malxey hu da izin ki elefan de Rita mismari waziri de Martin.
Martin no abil na imanu ki te nun postriunfa. Ren jadin ki te sen maxim bon xahuyuxiyen in den xaher, mas nunli te no hare exidi. Mas te no vole na postriunfa, te, minimum, vole na patu, fe folo, te no teslimu. Te fikir dur lungo watu ku maxim bon harka sen keto ji, dur na xorjui ki te hare xosu watu in sesu watumeter, te karar na atake waziri de Rita, mas, hinte bujo waziri de Martin dur na gibe xahu tas tesu manwangu. Martin no hare alo opsyon kom na harka sesu wangu cel gona fe xahutahta. Fe fini, Rita gibe xahumatu hu da finigi yuxi.
Martin xoku. Te awtomati weyhanta Rita mas te loga nilto. Hukimuyen gongaw triunfa de Rita.
Martin sotikal estaycu ji awidi, dur na fikir, “Mi xa multi treyna cel na maxbongi misu daraje.”
Denmaner, Rita cudu moypayado dao tas Norge cel na yuxi anti ustayen fe xahu.
Xafe watumon, te sen denloka. Te befuraha multi den dao. Te dadal na xekaste bannumer Gaoalimyen hu da cosan tesu talento fe hataya ki te sen juni.
Day Rita le visita te sol ban dua mara finfe ki te weda cel moywatu.
“Mi xa moywatu sen ton yu koski mi sen yu,” te loga tas lil Rita.
Ete soho weygebo ji day Rita awcu.
“Ajabu weda, ajabu weda…,” lil Rita solo loga lilhazuni.
Lil Rita garizeli jixi ki te ingay na hwepi na intreaksyon ton Martin celki hinte fale resta de misyon. Nunli, Rita sol ingay na fokus tem sesu profesi ji sesu neo hobi: xahu.
Ban din, Sofia le idi cel apartamen de Rita cel na bla, na glu cay ji na yuxi xahu.
“Mi besurprisa den day boncu de yu kos alim de yusu kuzin, Deysi. Fe leya, mi moywatu xekaste yu; fe nunya, he yu moywatu xekaste mi. Multi xahuyen haja plu nyan cel na dadal den daraje hu yu hare da. Mi jadin ki Deysi ible hare ban lil siri fe gao alimyen,” Sofia komenta.
“Si… si… Mi jadin ki te sen daymo bon cel na alim. Ible, to sen talento,” Rita loga, dur na kwasigi yolyukal.
“Ji, hay keto tem te?” Sofia swal har nenpimpan jixifil.
“Te ruidi cel Awstrali.”
“O, Interesne! Nunto, kam yu jixi banto, Rita? Maxpul kom na sintesis molekul in misu syensidom, mi fikir ki, ible, ren abil na ewreka maner cel na dao tras watu,” Sofia loga.
Har bokado munte, Rita oko te. Kam Sofia jixi ki Deysi fatoli sen te, mas of xaya? No, ible dento sen tasaduf, te fikir. Rita jixi ki Sofia sen daycinonpul syensiyen hu da pasa multi watu in tesu syensidom dur na fale kimikali jaribi, mas te nilwatu fikir temki te ger interes tem watudao.
“Watudao? Kam dento sen ible?” Rita swal.
“Mi no sen denmo yakin, mas ban sikoli hesabu, hu mi le fale dur na lilpawbu in parke, ixara tas mi ki dento sen banmo… ible,” Sofia loga, dur na xidu na memori.
“Mi jigam ki dento gwanxi fukuza mekani ji haji no poskoberido materyal, fe maner ki ren abil na ruidigi watu wey tyanli xey nenhar na yongu moy energi de kosmo, denmaner hu ban insan jeni. Mas, denmaner hu yu abil na imaje, dento sen sol misu hipotesis.”
Rita cakarecu kos den xomin, mas te dadal na lilmo aham to.
“O, mi oko… To sen suprem ki yu fikir tem to, mas, mi no jixi ku mi abil na sahay yu kemaner.”
“Kam yu fikir ki to sen ible?” Sofia jidi swal.
“Yu swal dento tas mi keseba? He yu sen ustayen tem denoto tema, no mi.”
“Pia yu sen daycinonpul, azizuyen, ji yu pia hare day imajeya. Kam yu no kolyo to fe leya?”
“Okey, to sen bon. Mi le jixi ki to sen idey tem fiksyon. Eger to sen ible, imi ger abil na fale daydenmo multi bon xey, mas pia denpul tekno ger sen hataripul in mal hanta. Nunto, ible, kosmo abil na majnunicu fe folo ki ban xey ruanda in watu or ki watu ruanda… Mi loga keto!? Hata mi no aham hinto hu mi jale loga da…”
Sofia tabasum.
“Yu sen rasonapul, Rita. Insanlari haji no sen jumbi tas denpul fatmin, ji pia kosmo ger abil na sangu ban regula tem dento,” Sofia estay ji maxusgi.
“To sen yukwe na hare hin bla ton yu, ji xukra kos cay ji yuxi fe xahu. Mi dupul duregi na fikir ku mi abil na xekaste yu kemaner. Finfe xaya!”
Ji te exidi.
Uje dur na sen solo, Sofia seloga, “Ay, no… Mi le no jixi ki hinto ger abil na xoru denmo jaldi.”
Rutu solo idi cel drevogeo. Te suki na sampo intre drevo, na nasa nasacu de moksay, na ore darakisoti de kasirudo lilxube of bax sesu sapatu, na hisi tazeya de saye.
Te ata cel lilnahir, te side, ofplasi sesu sapatu ji te plasi sesu peda in sui.
Abruto, moyto sotilkalcu. Te estay ji jwan. Te oko day baru hu da nercu.
Rutu yongu antibaruli esprey ji baru xorawidi.
Rutu loga, “Mafu, baru, mas mi no sen peldo na beyam, nundin.”
Jasusiyen Kantaka, hu da labas syahe labas, hu da koberi sesu total jismu, minus sesu oko, har beltu har ban tul, fale espesyal misyon temki te musi na rucudu Kijawi Cinju, hu da sen bax kowa de hataripul krimentim, hu da belide hataripul lideyen Gubangu, hu da vole na krasi globali ekonomi.
Kantaka dadal na fobi ban gardiyen yon holografi fe xabahu, jaxali, te inidi basidom hu in da te jento multi manixu hu te asan abil na xekaste da ji, fori xafe to, te nenabilgi sistema fe laser hu da gardi Kijawi Cinju. Te hifazi to in sesu jebu, mas, Gubangu, daybalayen hu da gaoje 2.1 metro, xoratake te.
Agilya de Kantaka no sen kufi cel na xekaste Gubangu, hu da gibe daybala darbe tas te. Kantaka kriban ixikalcu kos den darbe, mas te velosi fikir ji karar sesu jaxali harka: te jeti Kijawi Cinju pas janela. Dento awjuigi Gubangu, ji Kantaka yongu den kihoy cel na yongu bomba fe dudan ji na awpawbu.
Denwatu hu Kantaka xerca Kijawi Cinju, te no abil na ewreka to koski ban rakun uje porta to cel sesu goyuogar.
Misu kuzin ji mi anda pas kijawi medan fe den termomosemli xafesoba. Te loga tas mi ki te vole na onexa hosu hu denloka te ji tesu patre xugwan na mahi.
Imi anda dao fol wairbagor.
Ban duayen fe tero , hu da gardi sesu kyota, kriban atake imi.
Denwatu hu imi ata cel hosu, mi surprisa tem tosu dayje. To sen maxmo day kom care pedabolli medan.
Misu kuzin peridi ban lilnavi hu da sen dokido in hosubyen ji te invita ki pia mi peridi to. Imi side ji te padelu hoy midiya de hosu.
Imi no multi bla. Sotikalya sen lilmo nenkonfortane, mas, imi nerxali xorxugwan to. Fe fini, te loga ki hosu sen sim kom terapiyen tas te.
Mi ger preferi na yuxi videoyuxi, mas mi aham ki misu kuzin vole na tonyongu den momento ton bante, koski, xugwanpul, te no multi pala tem sesu ganjon. Fe folo, mi xidu na laxocu cel na jacigi den hadya.
Abruto, asman xoru na luminkalcu. Ban piu ji koncun xoru na hewansa, na lala, na krea musika hu da asan preata cel imi kos leli sotikalya de hosu. Ban estare xoru na precu in asman ji ban atexkoncun xidu na konkure anti ete. Samawatuli, ufuku xoru na rosocu durki Sola infracu ji xorawcu.
Mi sen ganjonpul ji, banmaner, mi vole na wawa, finfe ki misu kuzin xoru na sifrelala melodi har posjijondo sotimon ji, xafe to, te loga, “Nunto, imi ingay na ruidi cel baytu.”
Amanda moywatu radya otimaismo. Te hare multi doste. Te sen jixifil, amusane, populer ji palafil.
Fe alo comen, Sandra sen sotilil, jandan ji te preferi na solo pasa watu. Multi te loga ki te sen ajabu koski te max preferi na programa videoyuxi kom na labas modali labas ji na idi cel parti.
Sandra fikir ki multi te sanguli loga coxo tem te. Ible, dento sen to hu da sengi te sotilil ji posxinloyfil.
Hatali, Amanda vole na sencu doste de Sandra.
Unyum, Sandra xidu na posjui te, mas, xosu xafe xosu, te fikir ki te suki Amanda, fe folo, ete nerxali sencu doste.
Xafe to, Sandra xoru na interes tem maner hu fe da Amanda abil na sen dostefil ji joxufil. Te hata xiwon na sen sim kom te.
Fe folo, Sandra xoru na konduta fol maner de Amanda: te xoru na max tabasum, na yongu max meykapu, na pala ton max insan, mas, te xoru na wanji na fale xey hu te suki da. Te wanji na sen he se.
Hatali, Amanda no antiya den neo filya de Sandra.
Ban din, dur parti in baytu de Amanda, Sandra xorjui ki te ganjon kalya. Te inidi banyokamer ji te xoru na wawa. Te xoraham ki te nun wanji se.
Amanda, hu da yolyu tem Sandra, swal tas te ku keto okur.
Sandra plasi sesu hanta in tesu ketif ji te jidi loga, “Mi fikir ki to kriban sen satu des dua fe noce. Mi ingay na ruidi cel misu baytu leki mi sencu haulixu.”
Finili, Sandra exidi of parti har ajabu tabasum, mas, to sen tesu awtenti to.