Mesi tiga, 2021
Mi xidu na eskri yon ordinari lexi ji jandan jumle.
Denpul eskri sen maxmo asan na doxo, ji folki banto sen maxmo asan na doxo, doxoyen maxmo amiku intreaksyon ton to. Folki ete min yongu energi kos yusu eskrili estilo, ete xa hare max restado to tas yusu idey.
Ji ete xa maxmo lungo doxo. Energi de maxori doxoyen filya na daifcu xafe na doxo bage of makale or esey. Eger doxoli motsu sen kufimo xosu, max te duregi finfe fini.
Hay Italili yam hu ren namegi da saltimbocca, hu da mena “tyao cel in munte”. Misu cele denwatu hu mi eskri abil na name saltintesta: idey tyao cel in yusu kapi ji yu eskaso xorjui lexi hu da le plasi oto denloka.
To sen godo na onxala ki he banwatu eskri ger abil na sen solli idey. Ible, yu no hata vole dento. Mas tas maxori eskriyen, fe maxori mara, dento sen cele. Kungan intre maxori eskri ji solli idey no bepulgi poemaya.
Maxpul, na eskri jandan sen maxmo lutufpul. Denwatu hu yu eskri fe dekorapul maner cel na inxo insan, yu kosa ki ete maxpul ergo sol celki yu abil na kwasisen estilopul. To sen sim fe na pospel lungo fustanli koda fe yusu ruke hu yusu doxoyen musi na porta da.
Ji am memori, eger yu eskri in Englisa, ki multi te of yusu doxoyen xa no sen aselli Englisayen. Ible, etesu aham fe idey sen maxmo suprali kom etesu aham in Englisa. Fe folo, yu no abil na jadin ki na eskri tem katina tema mena ki yu abil na yongu katina lexi.
Mimbay, dekorapul eskri no sol sangu idey. Pia, to abil na sangu otosu poshay. Denseba ban insan denpul dueskri, cel na sangu fato ki ete hare nilto na loga. Fe kompara, na jandan eskri sengi yu durepulmo cipenkal. Eger yu loga nilto jandan, to xa sen mimbay tas moyte, fe inkludi tas yu.
Jandan eskri pia maxmo bon dudure. Insan hu da xa doxo yusu xey fe xaya xa sen fe banmo sama halu kom insan of alo dexa hu da doxo to nundin. Kultura ji basa xa le alocu. Yu no sen burfahuri eger dento sen muhim tas yu, samamaner hu to no sen burfahuri, ki moksayyen kostrui kursi cel na dure.
Sipul, dudure no sen sol xigoli sifa de kursi, or de eskri. To sen ixara ki yu le ergo bon.
Mas fe hataya ki moy hinto sen real fayda of na eskri jandan, nilto of oto sen seba hu mi fale to. Cuyo seba hu mi dueskri jandan sen ki na nenjandan eskri cufam mi. Denwatu hu mi eskri jumle hu da kwasisen godomo fukuza, or hu da yongu hajakalmo eskolyapul lexi, to no kwasisen dekorapul tas mi. To kwasisen maharakal.
Mimbay, hay mara hu denwatu yu vole na yongu fukuza jumle or dekorapul lexi cel efeto. Mas yu ingay na nilwatu fale to nyatukal.
Alo seba hu misu eskri fe fini sen jandan sen to hu denmaner mi fale to. Mi velosi eskri unyum xoreskrixey, ji xafe to, mi yongu plu din na penci to, fe na xidu na kosa ki moyto am sen precisomo sahi. Multi to of hin penci sen na awjeti, ji dento kosa ki jandan eskri sencu hata maxmo jandan.