Stories by Vanege

Hikaye fal Vanege

Safe Rubahe

Hinte is juni rubahe. Tesu tofalar is totalmo sefide kom wadi xafe taze dutaluji. He nil bruno or syahe burtyan is okoble. In rubahelar, nilto is maxmo safe kom tesu tofalar, ji te is daymo fahur tem to. Kos to, te name "safe rubahe".

Bardimos ata. Fe soba, denwatu hu rubahe exidi sesu ogar, ete oko xanxwi hu da is nenimanublemo sefide. Juni rubahe, hu da nilwatu oko taluji, fori wole na yuxi fe to. Ete tyao, goyu, guluncu. Taluji is yukway ji amusane.

Hin juni rubahe wole pia na oko ki taluji le alogi etesu jowey kumaner. Lildrevo ji daypetra, bax talujili cengo, no haji is aloyagible. Pia perya de hosu no haji is okoble. Moyto is sefide, sefidemo safe, har safeya similer sol kom dento de safe rubahe.

Plu rubahe le yuxi fe exya dur total dina. Noce xorucu, ji atre voka juni rubahe. Moyte ruata, minus safe rubahe. Te le gomo teli kentan. Te no haji rukone ki te ata of kuloka. Te sonxido. Moy alo rubahe xerca te, mas kos sefide safeya de tesu tofalar, ete no suces.

Totalmo luminkal. Safe rubahe fe nunya sol ore plu kaospul eko. Haulsa tayday rubahesa. Te hawfu. Tesu unyum somno ex ogar xa is hawfupulmo bardipul. Rubahe sangocu ji bolacu fe comen de daypetra. Fe onxala, tesu nenewrekableya pia xa funsyon anti haul yammey fe rubahe.

Fe fini, soba. Haul sotikal. Safe rubahe musi na bonyongo kurto luminpul watu cel na riewreka sesu famil. Fe asif, le hay hata max taluji dur noce, ji fe folo, he ban pedali marka koberido. Rubahe haja idey... ji te ewreka!

Nenokoble, har velosi tyao, safe rubahe suces na bujo kargux. Har sesu denta, te kata gardan. Per mor kargux, rubahe guluncu, celki tesu tofalar bekoberi taze roso damu. "Denmaner, mi xa okoble!" rubahe fikir.

Sipul, xafe watumon, un te of familyen de rubahe xoroko roso figura hu da harkacu fe telije. Mas, koski te le nilwatu oko similer banto, ji koski te oko multi damu, familyen xoru na awpawbu ji na dayloga:

"Am awpawbu, hay kayvu!"

Gao Drevo

Hay wadi hu moy planta armonipul jiwa. Denloka hay sosyal regula, ki planta no haki na iscu maxmo gao kom tiga metro. Dento yakingi, ki moy plantali bioyen abil na taslum kufi lumin cel na bono jiwa.

Fe hataya, ban dina, dayvento preporta bija of teli loka. Xafe watumon, bija kufi xunjan, celki ren abil na oko ki bija is of jongo fe dahunli drevo hu da is totalmo nenkonedo in hin wadi.

Fe xoru, planta hu da ogar in wadi koxcu tem hin preata. Fol max ki jowey is doyan fe jongo, max ki to abil na tahamul ji adatecu fol alocu.

Hin newe drevo xunjan ji xunjan. Mas newe drevo no esto na xunjan lefe limite fe tiga metro. Te multi suki lumin, ji moywatu wole max to. Te xoru na krea dayo sistem fe xube ji dahun, cel na bujo max solali lumin.

Jali planta loga tas newe drevo: "Fe lutuf, am esto na xunjan, imi no haji taslum kufi lumin."

Gao drevo jawabu: "Eger uyu wole lumin, am xunjan. Mi layeya lumin koski mi le xunjan."

Mas no moy planta abil na xunjan, ji no moy planta wole na jento cel lumin. Fe bonxanse, den drevo is solo te hu da no ehtiram alote. Fe folo, alo planta karar na posjui hin miismomey unyen.

Ban dina, hay bofun. Multi bala vento dawidi wadi. Planta tongo fleksicu fol ventoli pel. Nereya de bante ton alote sahay ete na no sokutu. Mas gao drevo, kos sesu gaoya, no abil na taslum sahay. Te musi na solo tahamul moy ventoli pel hu da presyon moy tesu xube samawatu.

Gao drevo peti sahay: "Am sahay mi! Mi fikir ki mi xaner sokutu!"

Alo planta hu da no real abil na sahay, loga: "Am posxunjan! Am posxunjan!".

Mas posxunjan no is bilpul. Fe fini, drevo sokutu.

Xafe bofun, Sola ruata. Moy planta abil na oko kano de gao drevo hu da nun total leta per geo. Te morcu, ji tesu dahun ji bija awfley. Bannumer planta morcu kos sokutu, mas minimum fe nunya dome totalmo koberido har lumin.

Arteyen

Hay maymun hu da multi suki na rasama. Fe moy dina, te rasama plu newe xeyu. Te suki na rasama asman, natura, hewan. Te suki na rasama moyto, ji te suki na rasama moywatu.

"Denwatu hu mi dayo, mi xa is arteyen. To is misu roya."

Atre de maymun hifazi pesa tas sesu bete. Har pesa, maymun abil na estudi in xohrapul arteli eskol. In eskol, maymun multi estudi. Te wole na dadal sesu roya, mas te pia no wole poshifazi pesa de sesu atre.

Maymun pinpan musi na onexa sesu rasama tas alimyen. Alimyen multi komenta: "Yusu rasama is bono, mas kam yu abil na alogi den bage?" Dumara, ete loga ki rasama haja detale. Dumara, ete loga ki hay godo detale. Dumara, ete loga ki no hay kufi kolor. Dumara, ete loga ki hay godo kolor. Moywatu, ete no kufimo truti.

Maymun suces fe finili eksam, ji taslum eskolmen. Te is kox, koski te nun is huru. "Mi nun abil na rasama dento hu mi wole da, denmaner hu mi wole!".

Mas maymun haja na cudu pesa. Fe folo, te xerca person hu da wole na kari rasama. Fe bonxanse, maymun ewreka kliente.

Maymun wole na fale daymo bono ergo tas sesu unyum kliente. Eger klientelar is truti, te xa hare max xohra ji te xa hare max kliente. Xafe multi ergo, te fahur onexa sesu rasama tas kliente. Kliente jawabu: "Yusu rasama is bono, mas kam yu abil na alogi den bage?". Maymun karar na rifale total rasama.

Fe hataya ki maymun daymo talentopul, te haja xugwanpul kliente cel na taslum kufi pesa. Te moyte fikir "Eger kliente no is truti, te xa no ruata". Pinpan, te musi na rasama he sama xeyu dur total dina. Te pinpan no haji hare energi dur axam. Denmaner maymun jiwa dur plu nyan.

Mas ban dina, te karar na fale wakuf. Te le suces na hifazi kufi pesa cel to.

Te fikir "Mi nun abil na rasama dento hu mi wole da, denmaner hu mi wole!". "Mi xa rahatu har na huru rasama, denmaner hu mi le fale denwatu hu mi le is daymo juni."

Te side nere fe sefide paper, har pentuli brox ji inku. Te oko paper. Te xidu na image banto. Te oko paper. Te xidu na image he banto. Paper restacu sefide. Te fale plu linea. Mas nilto menapul precu. Te no suces na rasama dur total dina. Te le wanji denmaner hu na rasama har furaha ji huruya. Na rasama no haji is daymeylu, mas sol ergo.

Multi nyan pasa. Maymun nun is lawo. Te ergo fe nongyodom hu te le warisa da. Te le no pifu brox xorfe lungo watu. Kos jaxne, maymun bevisita sodar ji tesu bete.

Un juni bete wole na onexa rasama fe ajabu hewan tas tieli maymun.

Tieli maymun: "Kete is den hewan?

Bete: "Te is mumu!"

Tieli maymun: "O, mimbay, mi nun aham."

Bete: "Kam yu suki misu rasama, tie?"

Tieli maymun: "Kam yu suki yusu rasama, bete?"

Bete: "Si! Mi is kox tem to."

Tieli maymun: "Fe folo, yusu rasama perfeto. Am alogi nilto."

Bete: "Xukra! Denwatu hu mi is dayo, mi xa is arteyen!"

Tieli maymun: "Yu uje is!"

Dragon ji Panda

Nere fe kape de gao jabal hay gufa. Dragon ogar in to solo ton sesu hazina. Te hare multi dahabu, jawheri ji alo jacipulxey hu te le cudu da of plu jali xaher.

Dragon hisi ki te haji walu xeyu, ji ki jali xaher no haji interesne. Fe folo, te karar na fley cel teli loka cel na ewreka newe xeyu cel na maxusgi cel sesu hazina.

Xafe lungo fley, fe fini, dragon ewreka xaher. To is nenpinpan xaher hu da loka in drevolar. Koski moyto is sangodo bax dahun, dragon karar na geocu. Per geo, te oko panda hu da kwasi hare nil hawfu kos presenya de dragon.

Te swal tas panda: "Kastilo is keloka?"

Panda jawabu: "Kastilo? No hay kastilo hinloka."

Surprisado dragon swal: "Fe folo, keloka uyu hifazi uyusu jacipul xeyu? Kam uyu hare banko or hata jandan inplasidom?

Panda loga: "No, no. Imi no hare denpul xeyu."

Dragon is okoblemo posahamdo. Panda maxpul loga: "Imi no hifazi. Moyto hu imi haja da uje cuduble fe jowey."

Panda loga: "Mi nun is yamwol, fe folo, mi le toncudu bambu. Kam yu ger suki na yam ton mi?". Dragon, hu da pilodo kos sesu lungo dawoya, swikara. Panda is kox, ji loga "Eger yu haja banto, am jandan peti. Denmaner moyto funsyon hinloka."

Ete yam bonyampul supa, ji pala dur lungo watu. Panda, hu da is daymo dostemey, hikaye multi tem sesu jiwa. Pia te hare soloyapul jiwa.

Dragon loga fe fini: "Mi nun musi na awidi".

"Kam uje?" panda loga.

"Si, mi haja na garde misu hazina.

Panda nerecu cel dragon, ji gibe tas te lungo weygebo. "Dento mena keto?" dragon loga, hu da le nilwatu taslum weygebo fe leya. "To is maner na onexa ki mi le suki hin momento ton yu. Kam yu ger wole na jaribi?"

Dragon plasi sesu bala gebo wey panda, ji xoru na harka sesu fleytul. "Yu fale keto fe nunya?" panda swal.

"Mi porta yu cel misu gufa, koski yu is misu hazina."

Kolormo Okomar Piu

Hay jongo fe piu hu da multi suki blue xeyu. Den piu multi suki na plasi blue xeyu in sesu ogar ji in jali jarden. Fol maxmo ki jardenj is dekorado har bluexey, to is maxmo magnetosim fe piuli tonyen.

Mas un te of piu is kolormo okomar. Te no oko aloya intre blue ji jalo xeyu. Fol te, blue flura ji jalo dahun hare sama kolor. Fe resulta, te ixikal toncudu xeyu fe moydua kolor.

Moy alo piu suki na haha tem den nennormapul piu. "Am oko, te le ripul seleti gale kolor!" "Tesu jarden is daydenmo colo!" "Te xa nilwatu ewreka lubiyen."

Fe xoru, den coxo lawfen kolormo okomar piu. Mas xafe watumon, te posjui ete. "Fol mi, misu xeyu is blue. Misu xeyu is colo fol ete, mas oto is meli fe mi."

Alo piu xorjui ki kolormo okomar piu posjui ete. Na coxo te no haji is amusane koski te no ruaksyon. Fe folo, ete esto na lawfen. Ete ripul idi na xerca blue xeyu tas sesu suli ogar.

Hay xosu blue xeyu, mas hay multi piu hu da wole oto. Piu pinpan musi na jento cel bluexey. Pinpan okur ki piu cori xeyu de alo piu. Dento finikal okurgi posarmoni.

Kolormo okomar piu no rol in den posarmoni. Te trankwilo ergo tas sesu suli jarden hu te dekora da fol sesu suli suki. Tas sesu jarden, te maxusgi multi meli petra ji jozi hu alo piu posjui da.

Ban dina, visitane piu (VP) geocu in jarden de kolormo okomar piu (KOP).

VP: "Yu hare maxim meli jarden of moyto hu mi le oko da!"

Kolormo okomar piu is surprisado. Dento is unyum mara ki bante loga to tas te.

KOP: "Xukra. Mas yu suki misu jarden keseba?"

VP: "To daymo dayo ji jalo. Mi suki jalo kolor."

KOP: "O, mi fikir ki misu jarden blue."

VP: "Ha ha, yu is amusane. Jalo ji blue is samamenaxi! Den dua lexi mena sama to!"

Fe fato, pia visitane piu is kolormo okomar!

Leli Watuyen Wazo

Wazo is name de lawo piu. Wazo fikir ki denwatu hu te is juni, moyto le is perfeto. Moy hewan le is maxmo ehtirammey. Moy hewan le hare maxmo bono suki. Fol te, globa le is bono, mas fe nunya, globa is buru. Fe fato, Wazo no is daymo lawo, mas tesu ijen is yakinmo denpul.

Wazo hare dua bete. Ete is normapul junpiu hu da hare normapul ninili suki. Fe ban dina, ete peti tas atre izin na idi cel musikali xow.

Bete: "Kam imi harizin na idi cel musikali xow de Jonimo?"

Wazo: "Den Jojo is kete?"

Bete: "Te is xohrapul rapuyen!"

Wazo: "Uyu no harizin."

Bete: "Keseba???"

Wazo daymo belawfen den nenhajado swal. Fol te, jawabu is mingomo mimbay. Rapuyen wakil buru jiwali maner. Ete populergi dududan, alkohol ji alo burdava. Ete hata loga tem possantoxey!

Mas maxim nenswikarable masele is ki ete fale antinormamenli musika. Neframus ji burbasapul ki ete presenta lexili dukaku denpul kom arte. Musikali normatim le nilwatu aproba to. Bete musi na restacu teli fe ete. Eger no, ete xa hare buru suki. Kultura xa sonxido, ji sosyaltim xa dissokutu.

Wazo: "Kam uyu no abil na ore klasiko musika denmaner hu normapul bete fale?"

Bete: "Feka!"

Wazo: "Am no loga "Feka!". Am loga "Dyabol!""

Bete: "Dyabol!"

Wazo: "Am no loga "Dyabol!", dento is dambipul!"

Denwatu, bete xoru na wawa. Xafe watumon, Wazo aham ki te le is gomo xucyomey. Cel na peti mafu, te jeni tas sesu bete na tongo idi cel hewandom.

Multi doyan hewan loka in hewandom. Wazo realmo no suki den kolorpul hwanjin hu te ijen da cufampul tas sesu suki. Mas tesu bete kwasi is daymo kox, ji ete bewaw moy hewan.

Famil bonoko taco:

Wazo: "Hey, bete, am oko ki den piu is daydenmo simpatilay. Ete no abil na fley."

Bete: "Mas ete pawbu daymo velosi!"

Famil bonoko hufax:

Wazo: "Hey, uyu! Uyu fley keseba? Uyu is mamariyen! Mamariyen no fley!"

Hufax: "Am resta imi trankwilo, lawoyen!"

Bete belawfen xekayemeyya de sesu atre. Wazo no esto. Te xekaye. Te sahigi. Te poscosan. Te posyukway.

Fol max ki watu pasa, max ki xekayemeyya de Wazo magneto jui de nereyen. Lile grupo fe hewan le figuracu nere fe Wazo:

Hewanli grupo: "O, am oko! Mi le no jixi ki hewandom hare pia fosil!"

Wazo: "Fekali dyabol!"

Okre Solokrabe Okreyen

Hay sahel denloka hu multi meli solokrabe ogar. Moy solokrabe lebas hole hu da ofata mor holeli hewan. Bannumer hole is sol sefide, bannumer hole is kolorpul. Un solokrabe hare okrelor hole. Kos to, te name Okreyen. Hin hole no is daymo espesyal, mas Okreyen multi suki to.

Fe moy nyan hay dayo merasem. Kriban moy solokrabe idi cel to. To is merasem fe holeli porgi. Fol cwenton, moy solokrabe am gibe sesu hole tas solokrabe hu da is minmo lawo fe un nyan. Denmaner, komuntim riyongo bono hole. Pia, solokrabe suki na jaribi newe baytu.

Mas Okreyen, te no suki. Okreyen le no rol in merasem dur tiga nyan. Te fikir, "Misu hole is perfeto. To is bage of mi. To is misu to."

Xafe bannumer mesi, Okreyen kentan baxbaharili jabal. Abruto, Okreyen ewreka mor xarke. To kwasi is bonyampul. Nil masomo yamne hewan nere loka cel na konkure. Denpul kihoy okur sol fe un mara in jiwa de solokrabe. Okreyen loga, "Daykwantipul yamxey! Mi xa yam moyto!"

Okreyen xoru na yam. Te yam ji yam. Te hisi ki te maxmo ji maxmo katina abil na harkacu. Mas te durepul yam.

Abruto, okrelor hole de Okreyen gujecu. Te oko ki tesu baytu awsokutu fe multi bage. Te le is gomo lile. "No! Misu hole! Misu baytu!"

Holekal solokrabe paniko. Solokrabe haja bala dalutul cel na garde sesu daif ji bonyampul fubu. Ji plu masomo yamne hewan ata. Fori hala behaja cel na no morcu.

"Kwasi, mi no haji hare alo opsyon." Ji holekal solokrabe inidi jali plastikoli botela. Botela no is konfortane. Botela pia is daymo xorjuible.

"Bilpul, eger mi sangocu intre awjetixey, ren xa no xorjui mi."