Fairy Tales

Dahabulor Tofa ji Tiga Baru

Banwatu, tiga baru ogar in lile baytu in drevolar. Ete is Baru Papa, Baru Mama, ji Baru Bebe.
Baru Mama fale yamxey cel sobali yam. Te plasi to per daydayo dyex, per mididayo dyex, ji per daylile dyex. Mas yamxey is gomo termopul. Fe folo, baru awidi cel na sampo durki to bardicu.

Lile femnini hu da name Dahabulor Tofa sampo daw drevolar. Denwatu hu te ewreka baytu de tiga baru, te nasa yamxey ji te inidi. Unyum, te xidu na yam of daydayo dyex, mas to gomo termopul! Xaja, te xidu na yam of mididayo dyex, mas to gomo bardipul! Xaja, te xidu na yam of daylile dyex. To perfeto, fe folo, te awyam moykwanti to!

Denwatu hu te fini, Dahabulor Tofa hisi pule. Fe folo, te karar na side. Unyum, te side per daydayo kursi de Baru Papa, mas to is gomo gao! Xaja, te side per mididayo kursi de Baru Mama, mas to is gomo pahna! Xaja, te side per daylile kursi de Baru Bebe. To is perfeto! Mas Dahabulor Tofa is gomo wajen, ji kursi gujecu!

Dahabulor Tofa supraidi cel somnodom de baru. Unyum, te leta per daydayo bistar de Baru Papa, mas to is gomo sakate! Xaja, te leta per mididayo bistar de Baru Mama, mas to is gomo narem! Xaja, te leta per daylile bistar de Baru Bebe. To is perfeto. Dahabulor Tofa ja le xorsomno denwatu hu baru ruata ji side cel na yam.

"Bante le yam bankwanti misu yamxey!" Baru Papa dayloga.
"Bante le yam bankwanti misu yamxey!" Baru Mama dayloga.
"Bante le yam misu yamxey," Baru Bebe dayloga, "ji te le awyam moykwanti to!"

Baru Papa idi na side per sesu daydayo kursi.
"Bante le side per misu kursi!" Baru Papa dayloga.
"Bante le side per misu kursi!" Baru Mama dayloga.
"Bante le side per misu kursi," Baru Bebe dayloga, "ji te le guje to!"

Tiga baru supraidi cel somnodom.
"Bante le somno per misu bistar!" Baru Papa dayloga.
"Bante le somno per misu bistar!" Baru Mama dayloga.
"Bante le somno per misu bistar," Baru Bebe dayloga, "ji te haji hinloka!"

Dewatu hu Dahabulor Tofa jagecu ji oko tiga baru, te multi xorhawfu, fe folo, te pawbu total watu durki te ruidi cel sesu ogar, ji te nilwatu ruata!