Essays

Am Eskri Jandan” fal Paul Graham

Mesi tiga, 2021

Mi xidu na eskri yon ordinari lexi ji jandan jumle.

Denpul eskri is maxmo asan na doxo, ji fol maxmo ki banto is asan na doxo, doxoyen maxmo amiku intreaksyon ton to. Fol min ki ete yongu energi kos yusu eskrili estilo, max ki ete xa hare restado to tas yusu idey.

Ji ete xa maxmo lungo doxo. Energi de maxori doxoyen filya na daifcu xafe na doxo bage of makale or esey. Eger doxoli motsu is kufimo xosu, max te duregi finfe fini.

Hay Italili yam hu ren namegi da saltimbocca, hu da mena “tyao cel in munte”. Misu cele denwatu hu mi eskri abil na name saltintesta: idey tyao cel in yusu kape ji yu eskaso xorjui lexi hu da le plasi oto denloka.

To is godo na onxala ki he banwatu eskri ger abil na is solli idey. Ible, yu no hata vole dento. Mas tas maxori eskriyen, fe maxori mara, dento is cele. Kungan intre maxori eskri ji solli idey no bepulgi poemaya.

Maxpul, na eskri jandan is maxmo lutufpul. Denwatu hu yu eskri fe dekorapul maner cel na inxo insan, yu kosa ki ete maxpul ergo sol celki yu abil na kwasiya estilopul. To is similer fe na pospel lungo fustanli koda fe yusu ruke hu yusu doxoyen musi na porta da.

Ji am memori, eger yu eskri fe Englisa, ki multi ete of yusu doxoyen xa no is aselli Englisayen. Ible, etesu aham fe idey is maxmo suprali kom etesu aham fe Englisa. Fe folo, yu no abil na jadin ki na eskri tem katina tema mena ki yu abil na yongu katina lexi.

Mimbay, dekorapul eskri no sol sangu idey. Pia, to abil na sangu otosu poshay. Denseba ban insan denpul dueskri, cel na sangu fato ki ete hare nilto na loga. Fe kompara, na jandan eskri isgi yu durepulmo cipenkal. Eger yu loga nilto jandan, to xa is mimbay tas moyte, fe inkludi tas yu.

Jandan eskri pia maxmo bon dudure. Insan hu da xa doxo yusu xey fe xaya xa is fe banmo sama halu kom insan of alo dexa hu da doxo to nundin. Kultura ji basa xa le alocu. Yu no is burfahuri eger dento is muhim tas yu, samamaner hu to no is burfahuri, ki moksayyen kostrui kursi cel na dure.

Sipul, dudure no is sol xigoli sifa de kursi, or de eskri. To is ixara ki yu le ergo bon.

Mas fe hataya ki moy hinto is real fayda of na eskri jandan, nilto of oto is seba hu mi fale to. Cuyo seba hu mi dueskri jandan is ki na nenjandan eskri cufam mi. Denwatu hu mi eskri jumle hu da kwasiya godomo fuza, or hu da yongu hajakalmo eskolyapul lexi, to no kwasiya dekorapul tas mi. To kwasiya maharakal.

Mimbay, hay mara hu yu vole na yongu fuza jumle or dekorapul lexi cel efeto. Mas yu nilwatu ingay na fale to nyatukal.

Aloseba hu misu eskri fe fini is jandan is maner hu mi fale to. Mi velosi eskri unyum xoreskrixey, ji xafe to, mi yongu plu din na penci to, fe na xidu na kosa ki moyto am is precisomo sahi. Multi to of hin penci is na awjeti, ji dento kosa ki jandan eskri iscu hata max jandan.